काठमाडौँ महानगरपालिकाले तोक्यो स्वदेशी उत्पादनका फूल बिक्री गर्न यी ४६ स्थान

मंगलबार, १३ कार्तिक २०८१

काठमाडौँ – काठमाडौँ महानगरपालिकाले तिहारमा प्लास्टिकका फूल बिक्री वितरणमा रोक लगाएको छ।मेयर बालेन शाहले स्वदेशमा उत्पादन भएका फूलको बिक्री वितरणलाई व्यवस्थित गर्न प्लास्टिकका फूल बिक्री वितरणमा रोक लगाउँदै दिपावली, नेपाल संवत् तथा छठ पर्वका अवसरमा महानगरपालिका क्षेत्रभित्रका ४६ स्थानमा बिक्री वितरण प्रबन्ध गरेको जानकारी दिएका छन्।

उनले गतको वर्षको सिकाइ र अभ्यासबाट सिक्दै यसवर्ष फूल बिक्रेता किसानहरूलाई सहज बनाउने प्रयासका साथ मल, मार्ट, पार्क, पार्टी प्यालेस, सेन्टरहरूमा फूल बिक्री वितरणको व्यवस्था मिलाइएको बताएका हुन्।उनले स्वदेशी फूल व्यापारी किसानहरूले आफूलाई पायक पर्ने स्थान छनोट गरेर बिक्री गर्न सक्ने पनि प्रष्ट पारेका छन्।

जसका लागि सम्पर्क व्यक्तिको नम्बर वा महानगर प्रहरी बलको क्षेत्रबाट पनि सहजीकरण काम हुने उनले बताए।यसबारे थप जानकारी लिनका लागि काठमाडौं महानगरपालिकाको निःशुल्क नम्बर ११८० मा सम्पर्क गर्न वा नगर प्रहरीको हटलाइन नम्बर ०१५९०१७६३, ९८५१३५६५०९ मा पनि सम्पर्क गर्न सकिने उनले बताएका छन्। साथै मेयर शाहले व्यापारीहरूलाई प्लास्टिकजन्य फूल तथा अन्य सजावटका सामग्री बिक्री वितरण नगर्न नगराउनुहुन अनुरोध गर्दै यदि कसैले लुकिछिपी बिक्री गरेको पाइएमा प्रचलित कानुनबमोजिम कारबाही हुने चेतावनी पनि दिएका छन्।