भौतिक पूर्वाधार मन्त्रालयका सचिवको भष्ट्राचार काण्ड बाहिरियो

कैलाली – सुदूरपश्चिम प्रदेशको भौतिक पूर्वाधार विकास मन्त्रालयका सचिव इन्ददेव भट्टको भष्ट्राचार काण्ड बाहिरिएको छ । सचिव भट्टले आफ्नो पदीय जिम्मेवारी विपरीत कमिशनको सेटिङ्ग मिलाएर योजनाहरुको वितरण गर्ने गरेको पाइएको छ ।

उनी मुख्यमन्त्रीको समेत अवज्ञा गरेर योजनाहरु मनपरी किसिमले आफ्ना मानिसहरुलाई बाँड्ने, प्रदेश सभाका सदस्यहरुको मागको विपरीत कमिशन ख्वाउनेहरुलाई योजना बाँडेर नेकपाका सभासद र कार्यकर्ताहरुकाबीच अन्तरविरोध चर्काउने तथा केही व्यक्तिहरुलाई पैसा बाँडेर मनपरी गर्दै आएका छन् ।

उनका कारण प्रदेश सरकार नै वदनाम भएको भन्दै मुख्यमन्त्री तथा त्यस क्षेत्रका धेरैजसो नेता र कार्यकर्ताहरुले हटाउनु पर्ने माग गर्दै आएका थिए । सचिव भट्टले खुलेआम कतिपय व्यक्तिहरुलाई आफू मन्त्रालयमा पाँच बर्ष बस्ने भन्दै धम्कीसमेत दिन थालेका छन् ।

पाँच बर्षको अवधिमा मन्त्रालयले १० अर्ब रकम चलाउने र त्यसको १० प्रतिशत आफ्नो हातम पर्नेसम्मका कुरा गर्दै गर्दै विभिन्न पार्टीका नेताहरुसँग बार्गेनिङ गरिरहेका छन् । कतिपय स्थानबाट उनले सोझै आफन्तका नाममा चेक काट्न लगाएर रकम बुझेको जिल्लाहरुमा व्यापक चर्चा छ ।

यस्तो व्यक्तिको केन्द्रबाट सरुवा भएपछि काठमाण्डौ औरधोपचार गर्न जाने भनी धनगढीबाट काठमाण्डौ आएका सुदूरपश्चिम प्रदेश सरकारको भौतिक पूर्वाधार विकास मन्त्री पठान सिंह बोहरा, कर्ण थापा, सचिवका नातेदार लिलाधर भट्ट समेतका मानिसहरुको साउन २७ गते प्रतिनिधि मण्डल बनाएर संघीय मामिला तथा सामान्य प्रशासन मन्त्रालय र विभिन्न शक्ति केन्द्र धाएर सरुवा बदर गर्न लागि परेका छन् ।

यसरी प्रदेश कमिटीको अध्यक्ष जस्तो पदमा रहेका थापा तथा मन्त्री जस्तो गरिमायुक्त पदमा रहेका बोहरा आफूले गर्नुपर्ने काम नगरी एकजना सचिवको थमौति गर्न किन काठमाण्डौमा घर–घर र मन्त्रालय चहारिरहेका छन् भन्ने गम्भीर प्रश्न उब्जिएको छ । यस्ता गतिविधिले यी व्यक्तिहरु तथा सचिवकोबीच आर्थिक चलखेलबारे धनगढीमा चलिरहको चर्चाको पुष्टि हुनलागेको जानकारहरु बताउँछन् ।

सचिव भट्टले सरुवा भएपछि आफूले सुदूरपश्चिमका मन्त्री पठान सिंह बोहरा र प्रदेश कमिटीका अध्यक्ष कर्ण थापा लगायतका केही व्यक्तिहरुलाई खरिद गरिसकेको र केन्द्रमा पनि आवश्यक व्यक्तिलाई खरीद गरेर सरुवा वदर गरिछोड्ने भन्दै निकटवर्तिहरुसंग धक्कु लगाउने गरेको कुरा धनगढीमा चर्चाको विषय बनिरहेको छ ।

“म भ्रष्टाचार गर्दिन र भ्रष्टाचार हुनपनि दिन्न” भन्ने नारा दिने प्रधानमन्त्री रहेको सरकारका सम्बनिधत अख्तियार प्राप्त व्यक्तिहरुले अब भ्रष्ट सचिव इन्द्रदेव भट्टको बारेमा के गर्छन्, हेर्दै जानुपर्छ भन्ने सरोकारवाला जनताको भनाइ रहेको छ ।