संविधानअनुसार समानुपातिक सूचीमा रहेका नाम निर्वाचन आयोगमा पठाइने छः अर्जुननरसिंह केसी

काठमाडौं— नेपाली कांग्रेसका नेता अर्जुननरसिंह केसीले संविधानअनुसार समानुपातिक सूचीमा रहेका नाम निर्वाचन आयोगमा पठाउने बताएका छन् ।

सबै परिस्थिति र समावेशी चरित्रलाई समावेश गर्ने नेपालको संविधानको धारा ८४ (२) मा राखिएको व्यवस्था अनुसार सूची पठाउने उनले जानकारी दिए ।

“दलित, मुस्लिम उमेदवार बनाउन सकेनौं । यसकारण यो अहिले समावेशी बनाउनु पर्छ,” समानुपातिकतर्फ नाम सिफारिस गर्न बसेको कांग्रेस बैठकमा सहभागी नेता केसीले भने, “वाग्मती प्रदेशमा तामाङ समुदायको बाहुल्यता छ, यसलाई पनि संबोधन गर्नुपर्छ ।”

७ प्रतिशत मत घटेकोकाले पनि समावेशिताको विषयलाई प्राथमिकतामा दिनुपर्ने विषय बैठकमा उठेको उनले जानकारी दिए ।

समानुपातिक सांसद टुंगो लगाउन कांग्रेस पदाधिकारी तथा केही कार्यसम्पादन समिति सदस्यको बैठक पार्टी कार्यालय सानेपामा जारी छ ।

निर्वाचन आयोगले दलहरूलाई आजसम्म प्रतिनिधिसभा र प्रदेशसभाको समानुपातिकतर्फका सांसदको सूची क्लस्टर मिलाएर पठाउन निर्देशन दिएको छ ।