सरकारबारे केन्द्रीय गठबन्धनले छिट्टै निर्णय लिन्छः जनार्दन शर्मा

काठमाडौं— नेकपा माओवादी केन्द्रका उपमहासचिव एवं पूर्व अर्थमन्त्री जनार्दन शर्माले कर्णाली प्रदेश सरकारबारे केन्द्रीय गठबन्धनले छिट्टै निर्णय लिने बताएका छन् ।

शुक्रबार बिहान सुर्खेत विमानस्थलमा पत्रकारसँग कुरा गर्दै नेता शर्माले सो कुरा बताएका हुन् । उनले प्रदेशमा देखिएका उल्झन केन्द्रीय गठबन्धनले सुल्झाउने र कर्णाली प्रदेश सरकारमा कांग्रेससँग नै सहकार्य हुने पनि बताए । शर्माले मन्त्रिपरिषद पुनर्गठनबारे नेपाली कांग्रेस कर्णाली प्रदेश संसदीय दलका नेता जीवनबहादुर शाहीसँग पनि छलफल गरेको बताए । ‘केन्द्रको गठबन्धन अनुसार नै कर्णाली सरकारलाई नयाँ दिशा दिनुपर्ने आवश्यकता छ,’ शर्माले भने, ‘मैले आज बिहान मात्रै जीवनबहादुर शाही जीसँग पनि मिटिङ गरेँ । प्रारम्भिक छलफलमा छिट्टै नयाँ स्वरूप दिने गरी सहमति भएको छ ।’

पुस १० को सहमति अनुसार कर्णालीमा अहिले पनि एमाले–माओवादी गठबन्धनको सरकार छ । गएको हप्ता मुख्यमन्त्रीले विश्वासको मत लिँदा एमालेले शर्माको पक्षमा भोट हालेको थियो । निर्वाचन अघि माओवादी अध्यक्ष प्रचण्डले मुख्यमन्त्रीका लागि कांग्रेसलाई बचन दिएको भन्नेबारे पत्रकारको प्रश्नमा नेता शर्माले कर्णालीमा माओवादी नेतृत्वकै सरकारले निरन्तरता पाउने बताए । ‘कर्णालीको सन्दर्भमा हाम्रै सरकार हुन्छ । गठबन्धनका अन्य दलहरू सरकारमा सहभागी हुन्छन् । यसको निर्णय केन्द्रीय गठबन्धनले नै गर्छ’ शर्माले भने । नेता शर्माले माओवादीकै एजेण्डामा देश अघि बढे पनि पार्टी कमजोर हुनुलाई गम्भीरतापूर्वक लिनुपर्ने बताए । ‘मैले यो पटक भोट माग्दा नै पार्टी संगठनको काममा लाग्ने र मन्त्री नबन्ने वाचा गरेको छु । अब पार्टी संगठन निर्माणमा लाग्छु,’ शर्माले भने ।