रास्वपा सांसद ढाकाले अझै बुझाएनन् स्पष्टीकरण, जवाफ दिनलाई थप समयको माग

काठमाडौं— अडिओ प्रकरणमा मुछिएका राष्ट्रिय स्वतन्त्र पार्टीका सांसद ढाकाकुमार श्रेष्ठले पार्टीले दिएको समयभित्र लिखित स्पष्टीकरण बुझाएनन् । उनले आज दिउँसो ३ बजेसम्ममा स्पष्टीकरण दिइसक्नु पर्ने भएपनि आफू वकिलहरूसँग रहेको भन्दै स्पष्टीकरणको जवाफ दिन थप समय मागेका छन् ।

व्यवसायी दुर्गा प्रसाईंसँगको फोन सम्वादका विषय रास्वपाको अनुशासन समितिले २४ घन्टाको समय दिएर हिजो तीन बजे श्रेष्ठलाई स्पष्टीकरण सोधेको थियो । तोकिएको समयमा स्पष्टीकरण नदिएका थापाले समितिका संयोजक भरत देवकोटालाई फोन गरेका थिए । देवकोटासँगको मौखिक कुराकानीमा श्रेष्ठले आफूमाथि लागेको आरोप अझै स्वीकार गरेका छैनन् । आफ्नो आवाजलाई सम्पादन गरेर अडिओ बनाइएको र आफूलाई अन्यायमा परेको उनले दाबी गरेका थिए ।

उनि छानबिनबाट आफू निर्दोष ठहरिन सक्ने सम्भावना कमजोर देखेर, राजीनामानै दिने मनस्थितिमा पुगेको बताइएको छ । यद्यपि, अन्तिम निर्णय लिइसकेका छैनन् । यता अनुशासन समितिले भने सार्वजनिक भएको अडिओलाई फरेन्सिक टेस्टका लागि पठाउने तयारी गरेको छ । संयोजक देवकोटाले यस विषयमा नेपाल प्रहरीसँग कुराकानी भइरहेको जानकारी दिए । रास्वपाको अनुशासन समितिले ढाकामाथि छानबिनका लागि तीन दिनको मात्रै समय पाएको छ । पार्टी सभापति रवि लामिछानेले हिजो चितवनमा भाषण गर्दै यदि ७० घण्टाभित्र छानबिन गरेर कारबाही गर्न नसके आफूलाई गढीमाईमा बलि दिन चुनौती दिएका छन् । सभापतिको सो भाषणका कारण पनि समिति हतारमा छ ।