सरकारले नयाँ स्टक एक्सचेन्जको नाममा नीतिगत भ्रष्टाचार गर्दैछः डा. सिंह

काठमाडौं— प्रतिनिधिसभा सदस्य डा. अमरेशकुमार सिंहले सरकारले नयाँ स्टक एक्सचेन्जको नाममा नीतिगत भ्रष्टाचार गर्न लागेको आरोप लगाएका छन् ।

मंगलबार प्रतिनिधिसभा बैंकको शून्य समयमा बोल्दै उनले सरकार प्रति सो आरोप लगाएका हुन् । उनले सरकारले नयाँ स्टक एक्सचेन्ज र कमोडिटीको नाममा भ्रष्टाचार गर्न खोजेको बताए । सरकारले लाइसेन्स दिँदा पहिले बोलकबोलमार्फत दिनुपर्ने उनको भनाइ छ । नेपाललाई आवश्यक नै नभएको नयाँ स्टक एक्सचेन्ज खोल्न लागेको भनेर उनले आपत्ति जनाएका हुन् ।

“स्टक एक्चेन्जको लाइसेन्स दिँदा पहिले बोलकबोल गर्नुपथ्यो कि पर्दैन थियो रु नेपाल भन्दा ६ हजार गुणा बढी अर्थतन्त्र भएको देश चीनमा दुई वटा स्टक एक्सचेन्ज छन् । त्यहाँ हाम्रो भन्दा ५० गुणा बढी जनसंख्या छ । भारतमा पनि ५० गुणा बढी जनसंख्या, एक हजार गुणा बढीको अर्थतन्त्र छ । त्यहाँ पनि दुईवटा स्टक एक्सचेन्ज छ,” उनले भने, “तर, यहाँचाहिँ अहिलेको नेपाल स्टक एक्चेन्जको नाममा ठूलो करप्सन गर्न खोजिदैछ । जुन ६० अर्बभन्दा बढी जायजेथा भएको अहिलेको हाम्रो स्टक एक्सचेन्जलाई सिध्याउन खोजिदैछ ।”

नेप्सेको निजीकरण गर्ने नीतिलाई सरकारले थाँती राखेकोमा पनि उनले आपत्ति जनाएका छन् । सरकारको अहिलेको स्टक एक्सचेन्जको सेयर निजी कम्पनीलाई बेचेर क्षमता बढाउनमा सरकार उदासिन भएको पनि उनले बताए ।