म्याद सकिएको मदिरा बिक्री गरेको भन्दै महानगरले तिरायो दुई लाख जरिवाना

काठमाडौं— काठमाडौँ महानगरपालिकाले बजार अनुगमनका क्रममा म्याद सकिएको मदिरा बिक्री गरेको पाएपछि दुई लाख जरिवाना गरेको छ ।

महानगरको कृषि तथा पशुपन्क्षी विभागका प्रमुख डा अवधेश झाको अनुसारकाठमाडौँ महानगरपालिकाले वडा नं २६ स्थित देवदास मानन्धर सञ्चालक रहेको न्यू भिम स्टोरलाई रु दुई लाख जरिवाना तिराएको हुन् । अनुगमनका क्रममा ठूलो परिमाणमा म्याद सकिएको मदिरा बिक्री गरेको फेला परेपछि बजार व्यवस्थापन तथा अनुगमन ऐन २०७७ को दफा ९ अनुसार कारबाही गरिएको प्रमुख झाको भनाइ छ ।

महानगरले बजारलाई थप व्यवस्थित पार्न गत साउनमा अनुगमनका सूचक तयार गरी भदौ १ गतेदेखि नियमित अनुगमन गर्दै आएको छ । विगतका वर्षमा चाडबाडको समयमा मात्रै बजार अनुगमन गर्ने महानगरले यसवर्षदेखि केही समय अघिदेखि नै अनुगमन सुरु गरेको हो ।