अहिलेको व्यवस्थामाथि बढ्दै गएको भ्रमलाई सबै मिलेर चिर्नुपर्छः प्रधानमन्त्री

काठमाडौं— प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल प्रचण्डले अहिलेको व्यवस्थामाथि बढ्दै गएको भ्रमलाई सबै मिलेर चिर्नुपर्ने बताएका छन् ।

बुटवलमा पार्टीको लुम्बिनी प्रदेश समिति स्कुल विभागले बिहीबार आयोजना गरेको प्रदेशस्तरीय आधारभूत स्कुलिङ प्रशिक्षक प्रशिक्षण कार्यक्रममा प्रचण्डले गणतन्त्र उल्टाउने सपना देख्नेहरु सलबलाउन थालेको बताए ।

उनले गणतन्त्र, संघीयता, धर्मनिरपेक्षता र सामाजिक न्याय उल्टाएर देशलाई अस्थिर बनाउने षड्यन्त्र असफल पारिने दाबीसमेत गरे ।

गणतन्त्रको रक्षा र सुदृढीकरणका निम्ति दृढताका साथ अगाडि बढ्ने बताउँदै प्रधानमन्त्री प्रचण्डले भने, ‘परिवर्तनका मुद्दा उल्टाएर देशलाई द्वन्द्वमा फसाउने भयानक षड्यन्त्र हुँदैछ । त्यसमा सबैखाले प्रतिक्रियावादी शक्तिको साँठगाँठ छ । तर, हामी परिवर्तनको रक्षा गर्न १२बुँदे समझदारी, शान्ति सम्झौता र संविधान निर्माणका पक्षधर सबै शक्तिहरू एक ठाउँमा उभिएर जवाफ दिनेछौं ।’

उनले आजभोलि दार्शनिक एवं सैद्धान्तिक चिन्तन कमजोर हुँदै गएको बताए । ‘विचारको पक्षमा चिन्तनमनन कमजोर भएको छ । त्यसको प्रत्यक्ष फाइदा व्यवस्थाविरोधीहरूले उठाउन ख‍ोज्दैछन् । तसर्थ विकसित परिस्थितिअनुरूप नयाँ विचारको विकासमा हामीले जोड दिनुपर्छ’, प्रचण्डले भने, ‘हिजो अध्ययन, अनुसन्धान र नयाँ विषयको खोजीमा हामी सबैको रूचि थिय‍ो । त्यसले हामीलाई बाटो देखाउँथ्यो, बदलिएको परिस्थितिअनुसार अगाडि बढ्न उत्प्रेरित पनि गर्थ्यो ।’

पार्टी विभाजित हुँदा माओवादी कमजोर भएको र प्रतिक्रान्तिहरूको मनोबल उठ्न थालेको भन्दै उनले त्यसलाई चिर्न रूपान्तरणका साथ अगाडि बढ्नुको विकल्प नभएको औंल्याए ।

‘रूपान्तरण नेताहरूबाट हुनुपर्छ, अरूलाई उपदेश दिएर हुँदैन’ उनले भने, ‘गणतन्त्र, संघीयताको रक्षा हामीले मात्रै गर्न सक्छौं, अरूलाई खास चासो पनि छैन, उनीहरूको एजेन्डा पनि होइन । माओवादी कमजोर भए संविधानमात्रै विघटन हुँदैन, देश नै विघटनको खतरा रहन्छ । पछिल्लो समय धरान, नेपालगञ्ज, सर्लाहीलगायतका स्थानमा जे प्रयत्न गरियो, त्यो सामान्य छैन । गणतन्त्र नै उल्टाएपछि संघीयता पनि रहँदैन, त्यसपछि देश नै टुक्राउन सकिन्छ भन्ने गम्भीर षड्यन्त्र छ । यो कुरा हामीले जनतालाई बुझाउनुपर्छ ।’

परिवर्तनका पक्षधर सबै राजनीतिक शक्ति एक ठाउँ उभिएर प्रतिगामी षड्यन्त्र परास्त गर्नेबारे दलहरूबीच छलफल चलिरहेको उनले सुनाए ।

‘केही दिनमा बैठक बसेर ठोस समीक्षासहित अगाडि बढ्छौं’, दाहालले भने, ‘भूराजनीतिक दृष्टिले विश्वका महाशक्तिको दबाबमा हामी छौं । हाम्रा कारणले होइन महाशक्ति राष्ट्रहरूको शक्ति संघर्षको चेपुवामा हामी पर्नसक्ने खतरा छ । रूस–युक्रेन, इजरायल(हमास युद्ध र विश्वव्यापी परिघटना हेर्दा परिस्थिति ध्रुवीकरणतर्फ गएको छ । तसर्थ, नेपालले सन्तुलित र परिपक्व कूटनीतिक बाटो लिनुपर्छ । त्यसमा सरकारले सकारात्मक पहल लिएको छ । संयुक्त राष्ट्रसंघका महासचिवको नेपाल भ्रमणसम्म आइपुग्दा हाम्रो पहल उत्कर्षमा पुगेको छ ।’

प्रधानमन्त्री प्रचण्डले कम्युनिष्टहरूले बाँचुञ्जेल परीक्षा दिनुपर्ने बताए । ‘म पनि परीक्षामा छु, तपाईंहरू पनि परीक्षामा हुनुहुन्छ । यसपटक सरकारले निकै विवेक र दृढताका साथ कदम चालेको छ । भ्रष्टाचार नियन्त्रण, सेवा प्रवाहमा सुधार, भूमाफियाहरूलाई कारबाही, कूटनीतिक सन्तुलनलगायतका जति काम गरिएको छ, तिनीहरूको रणनीतिक महत्त्व छ’, उनले भने, ‘अहिले नै उत्पात, चमत्कार गर्न सकिँदैनथ्यो । हामी गठबन्धनमा छौं, त्यसका सीमा र जटिलताहरू पनि छन् ।’

सरकारमा रहेका पार्टीहरु सडक जाने भनेको जनतालाई प्रशिक्षित गर्न भएको उनले बताए । ‘सडक कब्जा गर्ने भनेको जनतालाई प्रशिक्षित गर्न खोजेको हो । अर्को भाषामा भन्ने हो भने सडक कब्जा पनि हो । के हामीले ज्ञानेन्द्रलाई सडक छाडिदिनु पर्ने हो?’, प्रचण्डको प्रश्न छ ।

उनले काठमाडौंमा नेताहरूबीच सल्लाह गरेर नै वडा र पालिकास्तरका जनतालाई व्यापक परिचालन गरेर संविधान, लोकतन्त्र र माओवादीको रुपन्तारणको पक्षमा सम्झाउने बुझाउने तयारी भएको बताए ।

आफू प्रधानमन्त्री भएपछि देशमा सुशासन, न्याय र समृद्धिका कामहरु भएको दाबी गर्दै उनले ‘प्रचण्ड चाहिन्छ’ भन्ने पुष्टि भएको जिकिर गरे ।