स्याउ खाऔँ बोक्रैसँग
आइतबार, ११ जेष्ठ २०८२
काठमाडौं—दिनहुँ एउटा स्याउ खाए डाक्टरबाट टाढै बस्न सकिने भनाई सबैजसोले सुनेका छौं । हामीमध्ये धेरै जना स्याउलाई ताछेर समेत खान्छौं । तर यसो गर्दा हामीले पाउन सक्ने थुप्रै स्वास्थ्यवर्द्धक कुराहरू गुमाइरहेका पनि हुन्छौ । स्याउलाई बोक्रैसित खानु सबैभन्दा फाइदाजनक मानिन्छ ।
स्याउको बोक्राबाट हाम्रो मिनरल्सको दैनिक आवश्यकता पूरा गर्न सकिन्छ । यसमा पोटेसियम, फोस्फोरस, फोलेट, क्याल्सियम, आइरनजस्ता मिनरल पाइन्छन् । यिनले हाम्रो हाड र दातलाई बलियो बनाउन सघाइरहेको हुन्छन् । यसमा उच्च रक्तचापसँग भिडन आवश्यक रासायनिक तत्त्व अरूमा भन्दा ६ गुणासम्म बढी पाइन्छ । भनिन्छ, दिनहुँ एउटा स्याउ बोक्रैसित खाने गरे उच्च रक्तचापमा धेरै फाइदा पुग्छ ।
स्याउको बोक्राका प्रमुख फाइदाहरू
१) उच्च फाइबरको स्रोत
स्याउको बोक्रामा पाइने फाइबरले पाचन प्रणालीलाई सुदृढ बनाउने कार्य गर्छ। यसले कब्जियतको समस्या हटाउने मात्र होइन, पेटलाई सफा राख्न सहयोग गर्छ।
२) तौल नियन्त्रणमा सहयोगी
बोक्रामा भएको फाइबर र पोषण तत्त्वले लामो समयसम्म भोक नलाग्ने अनुभूति गराउँछ, जसले तौल घटाउन चाहनेहरूलाई ठूलो लाभ पुर्याउँछ।
३)मुटु स्वस्थ राख्न मद्दत
स्याउको बोक्रामा पाइने क्वेर्सेटिन नामक एन्टिअक्सिडेन्टले रक्तचाप नियन्त्रणमा राख्न मद्दत गर्छ र हृदयघातको जोखिम कम गर्छ।
४) मधुमेह नियन्त्रणमा प्रभावकारी
यसमा रहेका यौगिकहरू र फाइबरले रगतमा चिनीको मात्रा नियन्त्रण गर्न सहयोग पुर्याउँछ। नियमित रूपमा बोक्रासहितको स्याउ सेवनले टाइप २ डायबिटिजको जोखिम घटाउने अध्ययनहरू छन्।
५) क्यान्सर विरुद्ध लड्ने क्षमता
स्याउको बोक्रामा फाइटोकेमिकल्स पाइन्छ, जसले क्यान्सरको जोखिम कम गर्न सक्ने विश्वास वैज्ञानिकहरूले गरेका छन्, विशेषतः कलेजो, आन्द्रा र स्तन क्यान्सरका विरुद्ध।
६) छाला र कपालका लागि फाइदाजनक
यसमा रहेका भिटामिन सी र अन्य एन्टिअक्सिडेन्टहरूले छालालाई उज्यालो बनाउने, कोष नष्ट हुन नदिने र कपाल झर्ने समस्यामा राहत दिने कार्य गर्छ।
आजकल स्याउको बोक्रालाई टल्काउन, आकर्षक बनाउन विभिन्न थरीका अस्वस्थकर प्रक्रिया अपनाउने गरिएकोले बोक्रासहितको स्याउ खानुअघि यो पूर्णतः सुरक्षित रहेको सुनिश्चित गर्नैपर्छ । स्याउ राम्रोसँग सफा गरी पानी वा नुनपानीमा धोएर बोक्रासहित सेवन गर्नु उपयुक्त हुन्छ। यदि सम्भव भएमा अर्ग्यानिक स्याउ रोज्नु राम्रो हुन्छ, जसमा रसायनिक मल र विषादी कम प्रयोग भएको हुन्छ।
