फेसबुकमा ७५ लाख फलोअर्स भएकी चर्चित नेतृको लज्जास्पद हार

काठमाडौं—फेसबुकमा ७५ लाख फलोअर्स भएकी चर्चित नेतृले लज्जास्पद हार व्यहोरेकी छन् ।

बंगलादेशको निर्वाचनमा होमिएकी तास्निम जाराले झण्डै ६० हजार मतान्तरले बीएनपीका उम्मेदवारसँग पराजित भएकी हुन् ।

चुनावमा पराजित भएपछि चिकित्सकसमेत रहेकी जाराले आफ्नो हार स्वीकार गर्दै ‘ढाका निर्वाचन क्षेत्र नम्बर ९ का बासिन्दालाई धन्यवाद दिएकी छन् । चुनाव जितेकोमा बीएनपी उम्मेदवारलाई बधाई दिएकी छन् ।

७५ लाख फेसबुक फलोअर्स भएकी जारा चुनावमा बीएनपीका उम्मेदवारसँग पराजित भएर तेस्रो भएकी थिइन् । उनले ४४ हजार मत ल्याउँदा विजेताले लाख कटाएका थिए । ४४ हजारलाई सम्बोधन गरेर जाराले भनेकी छन्, ‘हामीले पहिलो स्थान हासिल गर्न सकेनौँ, तर हामीले त्यो कुरा प्राप्त गरेका छौँ जुन धेरैले असम्भव भनेका थिए । मात्र केही हप्तामा । तपाईंहरू मध्ये ४४,००० जना लाउडस्पिकर बिनाको, बाहुबल बिनाको र द्वेष बिनाको अभियानको पक्षमा उभिनुभयो । तपाईंले सम्मान र निष्ठाको मार्ग रोज्नुभयो ।’

जाराका सात बुँदाका सार यस्ता छन्ः

१) म बीएनपीलाई उनीहरूको राष्ट्रिय विजयका लागि बधाई दिन चाहन्छु । ढाका ९ का विजयी उम्मेदवार हबिबुर रसिद हबिबलाई पनि मेरो शुभकामना छ । मैले हिजो राति उहाँलाई फोन गरेर बधाई तथा शुभकामना व्यक्त गरेँ । ढाका ९ का जनता र बंगलादेशको हितका लागि, म आगामी कार्यकालमा उहाँहरूको सफलताको कामना गर्दछु । हामी एक रचनात्मक शक्तिको रूपमा रहनेछौँ । जनताको हित हुने पहलहरूलाई समर्थन गर्नेछौँ र हित नहुने अवस्थामा एक सचेत एवं सिद्धान्तनिष्ठ प्रतिपक्षी आवाज बन्नेछौँ ।

२)यस अभियानमा महिलाहरूको गजब सहभागिता रह्यो । नीति निर्माणका धेरै छलफलमा सहभागी भएकी एक महिलाको रूपमा, मैले प्रत्यक्ष देखेकी छु कि हाम्रो उपस्थितिले बहसको स्वरूप नै बदलिदिन्छ । यो लडाइँ यस देशका प्रत्येक महिलाको सुरक्षा, मर्यादा र अधिकारका लागि थियो । हाम्रो अभियानलाई ध्यानपूर्वक हेरिरहेका प्रत्येक बालिकाहरूलाई म भन्न चाहन्छु याद राख्नुहोस्, सत्ताको बागडोर सम्हाल्ने ठाउँमा तपाईंको पनि हक छ । हामीले साहसको यस्तो बीउ रोपेका छौँ जसले महिला नेताहरूको नयाँ पुस्तालाई प्रेरित गर्नेछ ।

३) यस अभियानका मेरुदण्डका रूपमा रहेका हाम्रा स्वयंसेवक, तपाईंहरू नागरिकताको उत्कृष्ट उदाहरण हुनुहुन्छ । तपाईंले बंगलादेशमा राजनीतिक सक्रियताको नयाँ मानक स्थापित गर्नुभएको छ । मन नदुखाउनुहोस् । तपाईंले जनताको मन जित्नुभएको छ र यो नै सबैभन्दा कठिन विजय हो । हामी संगठित रहनेछौँ । हामी मुखर रहनेछौँ । हामी सँगै रहनेछौँ ।

४) निर्वाचन सकिएपछि अब म बेलायत फर्कन्छु होला भन्ने एक किसिमको बुझाइ छ । म यो कुरा स्पष्ट पार्न चाहन्छु मेरो जरा यहीँ छ, र मेरो कर्म पनि यहीँ छ । म कतै जाँदै छैन । हामीले यो अभियान एउटा चुनावको रातका लागि मात्र सुरु गरेका होइनौँ, हामीले यो राष्ट्रको राजनीतिक संस्कृति परिवर्तन गर्न सुरु गरेका हौँ । यो जीवनभरको काम हो र तपाईंहरूसँगै यसलाई निरन्तरता दिन पाउनु मेरो लागि गौरवको कुरा हो ।

५)हामीले प्रमाणित गर्‍यौँ कि सफा अभियानबाट पनि मन जित्न सकिन्छ । यद्यपि, हामीले कहाँ सुधार गर्नुपर्छ भन्ने पनि बुझ्यौँ । एउटा ‘सफा’ अभियान ‘बलियो’ पनि हुनुपर्छ । निर्वाचनको दिन हाम्रा पोलिङ एजेन्टहरूको साहस र केन्द्रहरूमा हाम्रो उपस्थिति नै तपाईंको भोटको एकमात्र रक्षाकवच हो । हामीले यो सिकेका छौँ कि शान्तिपूर्ण मोडेलको रक्षा गर्न हामीले धम्की र डरलाई सामना गर्न सक्ने अझ मजबुत संगठन निर्माण गर्नुपर्छ ।

६)जुलाई विद्रोह बिना यी कुनै पनि कुरा सम्भव हुने थिएनन् । लोकतन्त्रको यो पुनरागमनका लागि हामी ती व्यक्तिहरूको अविश्वसनीय बलिदानप्रति ऋणी छौँ जसले आफ्नो रगतले यो बाटो तयार पारे । म प्रोफेसर युनुस र उहाँको टोली तथा निर्वाचन आयोगप्रति कृतज्ञता व्यक्त गर्न चाहन्छु । यस्तो जटिल परिवेशमा विश्वसनीय राष्ट्रिय निर्वाचन गराउनु एक ठूलो चुनौती थियो तर लोकतान्त्रिक जनताको रूपमा हाम्रो अस्तित्वका लागि यो नितान्त आवश्यक थियो ।

७) ४४,००० मत एक बलियो आधार हो । जो जो दुःखी हुनुहुन्छ कृपया नहुनुहोस् । हामीले देखाएका छौँ कि यहाँ इमानदारीको कति ठूलो भोको छ । हामीले पुरानो ढर्रालाई तोडेका छौँ । हामी सबैको साझा ढाका ९ र बंगलादेश निर्माणको कार्यलाई निरन्तरता दिनेछौँ ।