बेंगलोरको लगातार पाँचौ हार, आन्द्रे रसेलको विश्फोटक ब्याटिङ
शनिबार, २३ चैत्र २०७५
कोलकता नाइट राइडर्सबाट वेस्ट इन्डिजका अलराउन्डर आन्द्रे रसेलको विश्फोटक ब्याटिङसँगै इन्डियन प्रिमियर लिग(आईपीएल)मा रोयल च्यालेन्जर्स बेंगलोरले लगातार पाँचौ हार व्यहोरेको छ ।
शुक्रबार राती बेंगलोरको घरेलु मैदान चिन्नावास्मीमा सम्पन्न खेलमा कोलकता नाइट राइडर्सले २ सय ६ रनको विशाल लक्ष्य पछ्याउदै बेंगलोरलाई ५ विकेटले हराएको हो । कोलकताले १९.१ ओभरमा ५ विकेटको क्षतिमा पुरा गर्यो ।
रसेलले १३ बलमा ७ छक्का र १ चौका प्रहार गर्दै ४८ रनमा अविजित रहे । रसेलले १८ औं ओभरमा ३ छक्का प्रहार गर्दै २३ र १९ औं ओभरमा टिम साउदीलाई ४ छक्का र १ चौका प्रहार गर्दै २९ रन बटुलेपछि कोलकताले सहज जित हात पारेको हो । कोलकताका लागि कुलदिप यादव,सुनिल नारायण, नितेश रानाले समान १ विकेट लिए ।
क्रिस लिनने ३१ बलमा ४ चौका र २ छक्का प्रहार गर्दै ४३, सुनिल नरायण १०, रोविन उथप्पा ३३ र नितेश राना ३७ रनमा आउट भए । कप्तान दिनेश कार्तिक १९ रनमा आउट भए । बेंगलोरका लागि नवदीप सैनी र पवन नेगीले समान २ विकेट लिएका थिए ।
टस हारेर ब्याटिङको निम्तो पाएको बेंगलोरले निर्धारित २० ओभरमा ३ विकेटको क्षतिमा २ सय ५ रन बनाएको थियो । बेंगलोरलाई विशाल लक्ष्य बनाउन ओपनर विराट कोहलीले ४९ बलमा ९ चौका र २ छक्का प्रहार गरी ८४ रनको महत्वपूर्ण इनिङ्स खेले ।
दोस्रो विकेटका लागि कोहलीले डी भिलियर्ससँग १ सय ८ रनको शतकीय साझेदारी गरेका थिए। १८ ओभरको पहिलो बलमा कुलदीप यादवले कोहलीलाई आफैं क्याच लिदै साझेदारी तोडे । आक्रमक रुपमा रन जोडेका डी भिलियर्सले ३२ बलमा ५ चौका र ४ छक्का प्रहार गर्दै ६३ रनमा र १९ औं ओभरको पाँचौ बलमा सुनिल नारायणकाे बलिगमा सुबमन गिलबाटले क्याच गर्दै अाउ६ गरे ।
ओपनर कोहलीले पहिलो विकेटका लागि पार्थिव पटेलसँग ७.५ ओभरमा ६४ रनको साझेदारी गर्दै राम्रो सुरुवात दिलाएका थिए । पटेल २५ रनमा आउट हुँदा मार्कस स्टोइनिसले १३ बलमा ३ चौका र १ छक्का प्रहार गर्दै २८ रनमा अविजित रहे । कृष्णलाई स्टोइनिसले अन्तिम ओभरको चौथो बलमा चौका र पाँचौ बलमा छक्का र अन्तिम बलमा चौका प्रहार गर्दै फिनिस गर्दै १८ रन जोडेपछि बेंगलोरले २ सय रन कटाउन सफल भएको थियो ।
यस अघि बेंगलोरले चेन्नई,मुम्बई,हैरावाद र राजस्थानसँग पराजित भएको थियो ।
