नेकपा एस प्रवेश गरेको २४ घण्टा नपुग्दै एमालेमै फर्किए अध्यक्ष सुनिल कौशल
सोमबार, २२ असोज २०८०
काठमाडौं— नेकपा एस प्रवेश गरेको २४ घण्टा नपुग्दै रोहिणी गाउँपालिका अध्यक्ष सुनिल कौशल पुन एमालेमै फर्किएका छन् । कौशलले आइतबार नेकपा एसका अध्यक्ष माधवकुमार नेपालसँग टीका लगाएर पार्टी प्रवेश गरेका थिए।
नेकपा एसको अभियानमा उनीसहित ६५ जना आफ्नो पार्टीमा आएको नेकपा एसले जनाएको थियो । कौशलले आफूसहितको टीम एमालेमै फर्केको बताए । ‘धेरै सोचेर मूल पार्टीमै रहने निर्णय गरिया, हिजो गलत भएछ’, उनले भने ।
पार्टीभित्रको आन्तरिक समस्याका कारण एमाले परित्यागको घोषणा गरेको भए पनि आफू साविककै पार्टी एमालेमा रहेको उनले बताएका हुन् । कौशलले नेपाली जनताको आड भरोसाको पार्टी नेकपा एमाले भएको उल्लेख गर्दै आफू विचलित भएर गरेको एमाले परित्यागको निर्णयलाई पुनः सच्च्याएको विज्ञप्तिमार्फत् बताएका छ्न् ।
उनले आफूसँगै पार्टी छाडेकाहरू सबैले निर्णय सच्च्याएर एमालेमै रहेको बताए ।
