भाग्य न्यौपानेसहित थुप्रै कन्टेन क्रियटर र कलाकार प्रहरीको निशानामा

काठमाडौं—भाग्य न्यौपानेसहित थुप्रै कन्टेन क्रियटर र कलाकार प्रहरीको निशानामा परेका छन् । भदौ २३ र २४ गते भएको जेनजी आन्दोलनमा थुप्रै सार्वजनिक सम्पत्ति तोडफोड र आगजनी गर्ने तथा गर्न उक्साउनेहरु प्रहरीको निसानामा परेका छन् ।

यसरी निशानामा पर्नेमा भाग्य न्यौपानेसहित गायक तथा संगीतकार चेतन सापकोटा, टिकटकर मनोज केसी, लोकदोहोरी गायिका सुस्मिता क्षेत्री रहेका छन् । न्यौपानेमाथि भिड उत्तेजित पारेको र अरुमाथि अगाजनी र तोडफोड गरेको आरोप लागेको छ ।

भदौ २३ र २४ गते भएको जेनजी आन्दोलनमा थुप्रै सार्वजनिक सम्पत्ति तोडफोड र आगजनी भयो । आगजनी र तोडफोडमा संलग्न व्यक्तिहरूको अहिले सामाजिक सञ्जालमार्फत भिडियोहरू बाहिरिन थालेका छन् ।

चेतन मंगलबार सिंहदरबार जल्दै गर्दा आक्रामक शैलीमा देखिएको तस्बिर सामाजिक सञ्जालमा जताततै पोस्ट भएका छन् ।

सामाजिक सञ्जालमा उनलाई सिंहदरबारमा आगो लगाउन उक्साएको आरोपसहित कारबाहीको माग गरिएको छ । तर उनले त्यसको कल्पना आफूले गर्न नसक्ने भनेर केही मिडियामा प्रतिक्रिया दिएका छन् ।

त्यस्तै, टिकटकबाट चर्चित बनेका मनोज केसी पनि यो मामलामा मुछिएका छन् । संसद् भवन अघिल्तिर नेपालको झन्डा ओढेर तत्कालीन प्रधानमन्त्री केपी शर्मा ओलीलाई ‘गाड्नुपर्छ’ भन्दै उनले गाली गरिरहेको भिडियो टिकटकभरि पाउन सकिन्छ ।

लोकदोहोरी गायिका सुस्मिता क्षेत्री राष्ट्रपति कार्यालयमा आगलागी हुँदा त्यहीँ देखिएकी छन् । ‘फाइनल्ली राष्ट्रपति भवन गयो’ भन्दै चिच्याउँदै खुसी व्यक्त गरेको भिडियो उनले आफ्नै टिकटकबाट पोस्ट गरेकी थिइन् । जुन अहिले हटाइएको छ ।

युट्युबर भाग्य न्यौपाने पनि यो विषयमा मुछिएका छन् । सहकारी ठगी मुद्दामा नख्खु कारागारमा रहेका राष्ट्रिय स्वतन्त्र पार्टीका सभापति रवि लामिछानेलाई निकाल्न भीडलाई आग्रह गर्दै न्यौपानेले भिडियो पोस्ट गरेका थिए, जुन भिडियो टिकटकमा भाइरल भएपछि उनी विवादमा तानिएका हुन् ।